नाशिक शहर लवकरच एका अभिमानास्पद आणि ऐतिहासिक क्षणाचा साक्षीदार ठरणार आहे. भारतीय हवाई दलाच्या प्रख्यात सूर्यकिरण एरोबॅटिक टीमकडून नाशिकमध्ये प्रथमच भव्य एअर शोचे आयोजन करण्यात आले असून, या कार्यक्रमामुळे हवाई दलाचे सामर्थ्य, शिस्त, अचूकता आणि तांत्रिक कौशल्य नागरिकांना प्रत्यक्ष अनुभवता येणार आहे. गंगापूर धरण परिसरात होणारा हा एअर शो नाशिकच्या इतिहासातील एक महत्त्वाचा अध्याय ठरणार आहे.
या एअर शोमध्ये सूर्यकिरण एरोबॅटिक टीमकडून एकाच लयीत उडणारी विमाने, वेगवान हवाई कसरती, अचूक वळणे आणि समन्वयाचे अद्भुत प्रदर्शन सादर करण्यात येणार आहे. हा कार्यक्रम केवळ करमणुकीपुरता मर्यादित नसून भारतीय हवाई दलाच्या प्रशिक्षण, शिस्त आणि तंत्रज्ञानाचे जिवंत दर्शन घडवणारा ठरणार आहे. विशेषतः तरुण पिढीला प्रेरणा देणारा आणि देशभक्तीची भावना जागवणारा हा अनुभव ठरणार आहे.
हा भव्य एअर शो दिनांक २२ व २३ जानेवारी रोजी सकाळी १० ते दुपारी १२ या वेळेत आयोजित करण्यात आला आहे. प्रजासत्ताक दिनाच्या पार्श्वभूमीवर होणाऱ्या या कार्यक्रमामुळे नाशिकच्या पर्यटन, सांस्कृतिक आणि ऐतिहासिक ओळखीला राष्ट्रीय तसेच आंतरराष्ट्रीय स्तरावर नवी ओळख मिळण्याची शक्यता आहे. जिल्हा प्रशासनाच्या पुढाकाराने विविध शासकीय विभागांच्या सहकार्याने या कार्यक्रमाचे आयोजन करण्यात आले आहे.
या एअर शोमुळे नाशिकच्या स्थानिक अर्थव्यवस्थेलाही चालना मिळणार आहे. गंगापूर धरण परिसरातील हॉटेल्स, रिसॉर्ट्स, रेस्टॉरंट्स तसेच स्थानिक व्यावसायिक आणि शेतकऱ्यांना यानिमित्ताने आर्थिक संधी उपलब्ध होणार आहे. कार्यक्रमस्थळी स्थानिक व्यावसायिकांना स्टॉल लावण्याची परवानगी देण्यात येणार असून, यामुळे रोजगार व उत्पन्ननिर्मितीस मदत होणार आहे.
मोठ्या प्रमाणावर अपेक्षित गर्दी लक्षात घेऊन वाहतूक व्यवस्थापन, सुरक्षा व्यवस्था आणि इतर आवश्यक सोयीसुविधांसाठी प्रशासनाकडून विशेष नियोजन करण्यात येत आहे. या एअर शोसाठी प्रवेश शुल्क आकारले जाणार असून तिकीट विक्रीची प्रक्रिया ऑनलाईन पद्धतीने उपलब्ध करून देण्यात येणार आहे. कार्यक्रमाचे ठिकाण, तिकीट विक्रीची लिंक आणि सविस्तर वेळापत्रकाची माहिती लवकरच अधिकृतपणे जाहीर करण्यात येणार आहे.
नाशिकच्या आकाशात घडणारा हा ऐतिहासिक एअर शो म्हणजे देशाभिमान, शौर्य आणि कौशल्याचा उत्सव ठरणार असून, नागरिकांनी मोठ्या संख्येने उपस्थित राहून या अविस्मरणीय अनुभवाचा साक्षीदार व्हावे, असे आवाहन करण्यात येत आहे.
